Clausurouse o VII curso ‘As literaturas infantís e xuvenís: Reescrituras do conto popular’

O VII Curso de Formación Continua ‘As literaturas infantís e xuvenís ibéricas. Reescrituras actuais do conto popular. Século XXI’ que se desenvolveu estes días na Biblioteca da Fundación Caixa Galicia chegou ao seu fin este mércores. Na clausura, presidida polo vicerreitor de Estudantes e Formación Contínua, Francisco Durán, participaron ademais o director do Departamento de Filoloxía Galega, Francisco Cidrás; o presidente da Asociación de Escritores en Lingua Galega, Cesáreo Sánchez; o director da Biblioteca Fundación Caixa Galicia, Pedro Lucas; e a directora do curso, a profesora da USC Blanca Ana Roig Rechou. Todos eles louvaron os contidos do curso e agradeceron, un ano máis, a notable participación de alumnos e alumnas interesados, este ano 126. Previo a este acto de clausura e da man do editor Manuel Bragado, de Edicións Xerais de Galicia, e do escritor Antonio Rodríguez Almodóvar tivo lugar a presentación do libro Reescrituras do conto popular (2000-2009). Esta publicación recolle un amplo número de traballos realizados polos membros da Rede Temática de Investigación ‘As Literatura Infantís e Xuvenís do Marco Ibérico e Iberoamericano’ e outros investigadores convidados, baixo a coordinación de Blanca-Ana Roig, Isabel Soto e Marta Neira, que amplían os aspectos tratados neste curso de formación, tanto na súa parte virtual como na presencial. Organizado pola USC e a Asociación de Escritores en Lingua Galega co apoio de diversas institucións, no curso tiveron lugar encontros con recompiladores de contos, con narradores tradicionais, con escritores e escritoras; mesas e coloquios sobre as reescrituras actuais de contos populares e a súa investigación, experiencias, talleres, etc.