O Departamento de Filoloxía Galega da USC homenaxea ao catedrático Antón Santamarina

Co libro Cada palabra pesaba, cada palabra medía. Homenaxe a Antón Santamarina o Departamento de Filoloxía Galega da USC quere recoñecer a traxectoria académica do catedrático de Filoloxía Románica, responsable de moitos dos máis importantes logros de lingüística galega dos últimos corenta anos.
O volume, editado polo Servizo de Publicacións da USC, presentarase este xoves, día 13, ás 12:30 horas no Salón de Actos da Facultade de Filoloxía nun acto de homenaxe presidido polo vicerreitor de Cultura, Elías Torres, e no que intervirán tamén os editores do volume, Mercedes Brea, Francisco Fernández Rei e Xosé Luís Regueira, así como o decano de Filoloxía, Ernesto González, e o propio Antón Santamarina. Recóllense nel preto de cincuenta traballos de lingüística e de filoloxía elaborados por compañeiros do catedrático.
Antón SantamarinaAntón Santamarina Fernández (A Fonsagrada, 1942) dirixiu o Instituto de Lingua Galega desde 1990 ata 2004, foi vicepresidente do Consello da Cultura Galega do 1992 a 1997 e é membro numerario da Real Academia Galega desde 1998. Foi ademais un dos fundadores da revista Verba, que tivo un papel fundamental no recoñecemento da lingua galega entre os lingüistas de fóra de Galicia.