O Día Mundial da Filosofía pon en valor esta disciplina académica no pensamento, na cultura e no individuo

Cada terceiro xoves de novembro, conmemórase o Día Mundial da Filosofía co que a UNESCO subliña o valor duradeiro da filosofía para o desenvolvemento do pensamento humano, para cada cultura e cada individuo. A Facultade de Filosofía da USC súmase a esta celebración simbólica a través dun programa de actividades que se desenvolverá ao longo desta semana e, no que destaca, un relatorio a cargo de Joan Fontcuberta, Premio Nacional de Ensaio e de Fotografía. As actividades botan a andar este luns 13, ás 18.30, na Sala Hipatia deste centro da USC, coa mesa de debate 'Cara a destrución do canon: novos modos de ser e de facer filosofía'. 

O martes 14, ás 18.00 horas, no Salón de Actos da Facultade, terá lugar unha nova edición do Ciclo de Cinema Filosófico coa proxección do filme Tropical Malady (2004). O mércores 15, á mesma hora e en idéntico escenario, o Premio Nacional de Ensaio e de Fotografía Joan Fontcuberta pronunciará a conferencia 'Comer cos ollos: a era da iconografía'. Previamente, ás 16.00 horas, está previsto que se desenvolva un Kahoot filosófico, con premios para os mellores resultados.

Doutra banda, o xoves 16, ás 12.30 horas na Aula 4, Daniel Rosende, de Unboxing Philosophy do IES do Sar, pronunciará a charla 'Escape room da caverna. Filosofía para pensar e cambiar o noso mundo. A partir das 13.15 horas, na mesma aula, Olaia Freiría, da Fundación Ética Animal, falará sobre 'Etica animal na aula'. Xa pola tarde, a partir das 16.00 horas na Sala de Xuntas, Tristan Katz, da Universidade de Fribourg, e Joaquín Fernández Mateo, da URJC Madrid, encabezan a xornada  'Sheffield Santiago de Compostela a wild animal ethics workshop'. Para completar o día, a partir das 19.00 horas no Pub Modus Vivendi, está prevista unha sesión de 'Filosofía a pé de rúa' na que Rebeca Beceiro imparte unha charla sobre Solaris, de Andrei Tarkovsky, xunto coa proxección de escenas do filme.