Nova edición do Programa de Extensión Cultural de Astronomía
O Observatorio Astronómico Ramón María Aller da USC bota a andar a vixésimo sexta edición do seu Programa de Extensión Cultural de Astronomía (PECAS), que ten como finalidade achegar a Astronomía sobre todo ao estudantado pero tamén ao PAS, PDI, e á cidadanía en xeral. A inscrición terá lugar dende este luns e ata o mércores 26.
Entre as actividades propostas deste programa figuran sesións sobre o uso do planisferio e xornadas de observación nocturna e diúrna onde se establecen os principios básicos da observación astronómica, tanto a simple vista como con prismáticos ou telescopio, de tal xeito que as persoas asistentes adquiran a preparación e experiencia necesarias para poder realizar observacións pola súa conta.
Ademais, haberá charlas teóricas sobre asuntos astronómicos xerais para complementar as de carácter práctico, onde poder explicar os conceptos e temas tratados nas sesións de observación.
O acto de presentación do PECAS 2025 terá lugar o vindeiro xoves, día 27, ás 20.15 horas na aula magna da Facultade de Óptica e Optometría. Todas as persoas que sigan con aproveitamento este programa poderán convalidalo por 1 crédito.
A formación impártese co apoio da Xunta de Galicia, o Ministerio de Ciencia e Tecnoloxía e a empresa Óptica Val.