A EPS de Enxeñaría amplía dotacións e equipamentos do grao en Robótica con novos compoñentes de tecnoloxía alemá
A EPS de Enxeñaría reforza as dotacións e os equipamentos do grao en Robótica con tecnoloxía alemá, grazas a que a compañía con sede en Renania Beckhoff formalizou a cesión ao centro universitario do Campus Terra da USC dunha plataforma de programación TwinCAT3, ademais de 10 equipos periféricos EK1100, dotados tanto de I/Os dixitais como analóxicos, que resultan axeitados para a automatización do desenvolvemento de tarefas docentes e de investigación na EPSE.
O lote de equipos e material cedido por esta compañía inclúe preto de 60 compoñentes que comprenden módulos de Control PLC, comunicación EtherCAT, módulos I/Os, dixitais e analóxicas, e fontes de alimentación. Estas novos equipos poden ser programados todos coa plataforma de programación TwinCat 3, de que dispón na actualidade a EPSE. Asemade, trátase de compoñentes e equipos que tamén se poden instalar en calquer PC para que o alumnado poida realizar prácticas nos seus propios equipos iformáticos, segundo indicaron docentes do grao en Robótica.
O equipamento cedido por Beckhoff Automation, unha empresa líder en tecnoloxía de control baseada en PC con delegación en Galicia, servirá para completar o laboratorio de Automatización de que dispón a Escola Politécnica Superior de Enxeñaría do Campus Terra e permitirá ao alumnado do grao en Robótica poder desenvolver competencias no manexo destas tecnoloxías, que poden resultar de aplicación para a realización de Traballos Fin de Grao ou Traballos Fin de Mestrado, así como de teses de doutoramento.
