A EPS de Enxeñaría inicia no uso e manexo de drons a alumnado de STEMbach no IES Lucus Agusti

A Escola Politécnica Superior de Enxeñaría do Campus de Lugo da USC inicia no uso e manexo de drons a estudantes de STEMbach do IES Lucus Agusti da capital luguesa a través dunha iniciativa de colaboración que permitiu aos estudantes preuniversitarios pilotar o dron Mavic mini, ademais de tomar fotografías do mesmo para a posterior elaboración dun modelo tridimensional.

Esta actividade que conecta a EPS de Enxeñaría co referido centro de ensino secundario da capital luguesa estivo a cargo de Sara Peralada Vázquez, alumna con bolsa de colaboración do mestrado en Sistemas Aéreos non Tripulados, e tamén contou coa participación da profesora da USC e coordinadora deste posgrao, Mariluz Gil Docampo.

Os estudantes de STEMbach no Ies Lucus Agusti Carmen Pérez Varela, Anxo Losada Fernández e Melody Vila Pérez, baixo a titoría do presor Ibai Quinteiro Recondo, aproveitaron a súa estadía completada en vésperas de Nadal na Escola Politécnica Superior de Enxeñaría da USC para facer voar o dron cos seus propios teléfonos móbiles, logo de adaptalos para proceder ao control de vos. Esta actividade práctica tamén permitiu aos futuros universitarios ensaiar a manobras co equipo no interior da nave de prácticas a EPSE.