Estudantes de máis de 20 países aprenden galego na Universidade de Santiago
Un total de 90 estudantes procedentes de 26 países dos cinco continentes aprenden lingua e cultura galegas na USC durante este mes de xullo, nos cursos de verán para estranxeiros e para españois de fóra de Galicia que organiza a USC a través do Instituto da Lingua Galega (ILG), coa contribución da Real Academia Galega e coa colaboración económica da Secretaría Xeral de Política Lingüística. Tratase da XXIV edición deste curso, ao que cada vez se incorporan máis estudantes e de máis países. O acto de inauguración desenvolveuse hoxe no salón de actos da Facultade de Filosofía. O vicerreitor adxunto de Investigación e Innovación, Pablo Ramil, foi quen o presidiu e nel participou tamén o secretario xeral de Política Lingüística, Anxo Lorenzo; o profesor Manuel González González, en representación da Real Academia Galega; Rosario Álvarez, directora do ILG, e Francisco Fernández Rei, director do curso. Todos os participantes destacaron o valor destes cursos pola inmersión que fan os estudantes, procedentes de comunidades lingüísticas diversas, na cultura galega e na lingua do país. O secretario xeral de Política Lingüística dixo que “estes cursos eran unha excelente carta de presentación da riqueza lingüística e cultural que nos caracteriza”. Diversidade Máis de 2.300 alumnos e alumnas de moi diversos países de todo o mundo levan participado nos cursos de verán de galego para estranxeiros da USC desde o seu inicio. Este ano, na vixésimo cuarta edición, os estudantes veñen da Alemaña, Arxentina, Australia, Brasil, Reino Unido, República Checa, Chile, Croacia, España, Estados Unidos, Finlandia, Francia, Grecia, Hungría, India, Irlanda, Italia, Marrocos, México, Polonia, Portugal, Romanía, Rusia, Suecia, Taiwán e Ucraína, entre outros países.. Finalidade O fin primordial dos cursos é darlle ao alumnado a oportunidade de familiarizarse coa lingua galega e coa realidade sociocultural de Galicia. Para isto, ademais das clases teóricas e prácticas de lingua, o programa inclúe leccións sobre literatura, historia, xeografía, arte etc., de Galicia, así como excursións e visitas a lugares de principal interese cultural e paisaxístico. Dentro dos cursos hai distintos niveis: un nivel elemental, de iniciación á lingua para quen desexe introducirse no seu coñecemento; un nivel medio, destinado a quen xa realizou o curso elemental ou que posúa un coñecemento básico do idioma, previa realización dunha proba; e mais un curso superior de Filoloxía Galega para quen cursou o nivel medio ou acredite un bo dominio do galego.
