Fondo pesar na USC polo pasamento de Álvaro Rodríguez Eiras, presidente do Grupo Aresa

A USC manifesta o seu fondo pesar polo pasamento do empresario Álvaro Rodríguez Eiras, presidente do Grupo Aresa co que a Universidade impulsa, dende hai xa 25 edicións, o premio de desenvolvemento rural que recoñece proxectos clave na creación de emprego e riqueza nos ámbitos agrícola e gandeiro. O seu estreito vínculo coa USC e, moi especialmente, co Campus de Lugo, así como o seu papel na dinamización do agro galego, fixo que Rodríguez Eiras fose distinguido, no ano 2008, coa Insignia de Ouro da Universidade de Santiago de Compostela.

O Premio Aresa é un certame dirixido a empresas, grupos de investigación, asociacións ou calquera outra entidade que contribúa ao desenvolvemento da economía rural galega. Na traxectoria deste galardón, que xa acadou un recoñecido prestixio no sector grazas ao esforzo sostido no tempo de Rodríguez Eiras, figuran relevantes proxectos, centros ou personalidades vinculadas ao ámbito agroalimentario de Galicia. O galardón impulsado por Rodríguez Eiras pechou este mes a recepción de candidaturas de cara á que será a súa vixésimo quinta edición. 

No seo da traxectoria do presidente de Aresa, que destacou pola súa capacidade para concibir un agro acorde coa evolución dos tempos e capaz de manterse como motor para a economía de Galicia, cómpre destacar tamén a presidencia da Confederación de Empresarios de Lugo (CEL) ou da Confederación de Empresarios de Galicia.