O fotógrafo lugués Carlos Valcárcel doa unha fotografía do Cebreiro ao Campus de Lugo

O fotógrafo lugués Carlos Valcárcel fixo entrega este venres, día 2, dunha fotografía do Cebreiro á Universidade de Santiago que pasará a formar parte dos fondos da Vicerreitoría de Coordinación do Campus de Lugo. Ao acto de doazón asistiron o propio fotógrafo, Carlos Valcárcel, e o vicerreitor de Coordinación do Campus de Lugo, Carlos Herrero Latorre, acompañado dos vicerreitores adxuntos.
A fotografía doada, realizada de xeito analóxico en papel baritado e cunhas dimensións de 40x60, mostra a paisaxe invernal cos montes nevados nunha zona do Cebreiro.
O vicerreitor de Coordinación recoñeceu a Valcárcel como un dos mellores fotógrafos españois e agradeceu o xesto do artista a quen cualificou de mestre. Pola súa banda, o artista lugués, arroupado neste acto por numerosos amigos, agradeceu os eloxios recibidos e amosou a súa ledicia por esta doazón. Finalmente, o seu amigo Benjamín Santín foi o encargado de dedicar unhas palabras non só a obra de Valcárcel como fotógrafo senón tamén a súa xenerosidade.
Carlos ValcárcelCarlos Valcárcel Gay, nacido en Lugo en 1929, participou en numerosas exposicións tanto individuais como colectivas recibindo cuantiosos recoñecementos dende que comezou a súa actividade fotográfica a principios dos anos sesenta e que continua na actualidade, máis de corenta anos despois. A súa relación coa USC vén de lonxe e xa no ano 2004 realizou unha exposición na Igrexa da Universidade cunha recompilación das súas obras máis representativas ata esa data.