A frota de palangre de fondo da Organización de Produtores Pesqueiros do Porto de Burela, certificada coa ecoetiqueta Pescaenverde da USC

A marca Pescaenverde da USC certifica a actividade respectuosa da frota co medio ambiente, pois permite transmitir aos consumidores o seu perfil ambiental en termos de pegada de carbono e da súa taxa de retorno enerxética, alén de deixar patente que o seu labor desenvólvese cun baixo impacto no medio. A frota pesqueira de palangre de fondo da Organización de Produtores Pesqueiros do Porto de Burela (OPP-7) recibiu este mércores a devandita certificación nun acto no que se enxalzou o seu labor por ser a primeira da modalidade de altura que se certifica con esta ecoetiqueta que poderá empregar para a comercialización da pescada do pincho.

Esta ecoetiqueta ten o respaldo científico do Grupo de Biotecnoloxía Ambiental (Biogroup) da USC, que deseñou un software para promover o cálculo da pegada de carbono e da taxa de retorno enerxética adaptada ás características do sector pesqueiro. No ano 2013 a Oficina Española de Patentes e Marcas expediu o título de rexistro da marca Pescaenverde. Trátase dun selo que achega información ao consumidor sobre o impacto que os produtos pesqueiros teñen sobre o medio ambiente ao mesmo tempo que outorga un valor engadido aos produtos que incorporan a marca, impulsando a venda nun mercado cada vez máis competitivo e no que moitos compradores buscan produtos respectuosos co medio.

En Galicia contan con este selo máis de 30 confrarías de pescadores e con el dan valor aos seus produtos facendo ver aos compradores que son capturados cunha baixa pegada de carbono e de xeito eficiente enerxeticamente. Agora a frota de palangre de fondo da Organización de Produtores Pesqueiros do Porto de Burela (OPP-7), que captura pescada do pincho, convértese na primeira de altura que se certifica con esta ecoetiqueta.