Inauguración da exposición 'Vinte e catro anos de Andaina'

A Facultade de Veterinaria inaugura este xoves, día 8, a mostra ‘Vinte e catro anos de Andaina’, unha recompilación das portadas desta publicación dende que naceu en 1983. A Vicerreitoría de Cultura da USC organiza esta exposición que conta ademais co patrocinio do Fondo Social Europeo, o Instituto da Muller do Ministerio de Traballo e Asuntos Sociais e o Servizo Galego de Promoción da Igualdade do Home e da Muller da Xunta de Galicia.
Ao acto de inauguración, que terá lugar ás 19:15 horas na Sala Isaac Díaz Pardo do centro asistirán o vicerreitor de Coordinación do Campus de Lugo, Carlos Herrero Latorre; a vicerreitora de Infraestruturas e Servizos, Celia Besteiro; a vicedecana de Ordenación Académica de Veterinaria, Ángeles Moreno Grande; a delegada do Servizo Galego de Promoción da Igualdade, Ana Luisa Bouza Santiago, e representantes do colectivo Andaina.
Tras esta inauguración o Espazo de Danza da Universidade estreará, baixo a dirección artística de Juan Carlos Zahera, a coreografía ‘Cun par de TAkóNS!’ unha peza de creación colectiva que trata de transmitir os diferentes estados de ánimo na muller expresándoos por medio de estados físicos.