O Instituto Tecnolóxico de Matemática Industrial formalizou o pasado ano preto de trinta contratos con empresas e entidades

Durante o pasado 2014 o Consorcio Instituto Tecnolóxico de Matemática Industrial (Itmati) rexistrou un importante incremento da súa actividade, basicamente a través da súa actividade na promoción da transferencia de tecnoloxía matemática a partir do coñecemento desenvolvido nas tres universidades galegas e na achega de respostas eficaces e áxiles a demandas das empresas, as industrias e as administracións. Así se desprende da memoria anual aprobada polo consello de goberno do consorcio do que forma parte a USC. Durante o pasado ano puxéronse en marcha preto de trinta contratos coa participación directa de dezanove empresas e entidades, ademais de crear vinte e un postos de traballo de alta cualificación. Os proxectos desenvolvidos concentráronse en tres grandes áreas de transferencia, concretamente nos eidos da simulación, a estatística/big data e no da optimización. Destes tres campos, destaca á area da simulación numérica, con vinte e un proxectos activos que supoñen máis do 60% da facturación deste consorcio; seguida das de optimización con doce proxectos activos e de estatística/big data con sete. Deste xeito, a tecnoloxía matemática permitiu a Itmati propor solucións de grande interese en practicamente todos os sectores industriais, con particular interese nos de enerxía, materiais, naval e ambiente. Como se recolle na memoria presentada recentemente, o desenvolvemento destes proxectos achegou arredor do 95% dos ingresos do consorcio durante 2014, algo máis de 525 mil euros. Como sinala a presidenta de Itmati, a vicerreitora da USC Isabel Rodríguez-Moldes Rey, a intensa actividade do consorcio “é unha demostración de como a posta en marcha de Itmati permite consolidar o labor de transferencia de tecnoloxía matemática ao sector produtivo, labor levado a cabo polos grupos de investigación galegos de Matemática Aplicada, Estatística e Investigación Operativa dos últimos trinta anos”. Rodríguez-Moldes sinala que de cara aos próximo anos o consorcio “debe demostrar que é autosuficiente, eliminando o financiamento público directo e baseando o seu orzamento principalmente no financiamento privado.