ITMATI asinou no seu primeiro ano de vida contratos de I+D con 16 empresas
Nos seus dez primeiros meses de vida ao longo de 2013, o Consorcio Instituto Tecnolóxico de Matemática Industrial (ITMATI) asinou once contratos de I+D nos que participaron directamente dezaseis empresas e se involucraron 21 entidades diferentes, achegando o 81% dos ingresos totais dese ano. Contratos Feder, contratos de investigación e desenvolvemento individuais xestionados polo Centro para o Desenvolvemento Tecnolóxico Industrial (CDTI) ou contratos de colaboración tecnolóxica con empresas e entidades estranxeiras foron as fórmulas de colaboración coa industria utilizadas. As solucións achegadas nestes proxectos integran a tecnoloxía matemática máis innovadora e avanzada para contribuír a xerar valor engadido en campos como o control de calidade, a simulación e optimización de procesos ou a xestión, toma de decisións ou planificación de recursos. Segundo recolle o consorcio na memoria de actividade que acaba de presentar para o seu primeiro ano de vida –d ende a súa fundación o 7 de febreiro de 2013– o ITMATI asinou durante este ano convenios e acordos de colaboración coas tres universidades galegas, coa Fundación Pública Centro de Supercomputación de Galicia, coa Rede Española Matemática-Industria e co Centro Tecnolóxico de Repsol. Ademais, traballou en potenciar a súa visibilidade mediante actividades específicas de interacción matemática industria e de difusión e promoción das súas actividades e capacidades en distintos eventos, talleres e plataformas, sen descoidar a súa proxección en accións internacionais. No ámbito internacional, o Consorcio propiciou a celebración por primeira vez en Galicia, e por segunda vez en España, do 97 European Study Group with Industry (97 ESGIs), actividade de gran relevancia en Europa no ámbito dá Matemática Industrial, que constitúe un foro para traballar de xeito conxunto científicos industriais e investigadores matemáticos sobre problemas de interese para a industria. Ademais, ITMATI tamén abriu a primeira convocatoria 2013 para a incorporación de investigadores adscritos das tres universidades galegas, membros do Consorcio. A resolución recolle a adscrición de 21 investigadores, adscrición cunha validez temporal de catro anos, aos que se suman os once promotores de ITMATI que de forma transitoria se consideran adscritos durante un primeiro período de catro anos. Estes investigadores achegarán as súas capacidades científico tecnolóxicas ao consorcio e desenvolverán neste proxectos de transferencia para empresas e administracións públicas directamente relacionados coa misión deste instituto. ITMATI Creado o 7 de febreiro de 2013, ITMATI supuxo un fito importante de agregación de recursos entre as tres universidades galegas para promover a transferencia de tecnoloxía matemática e dar respostas eficaces e áxiles ás demandas das empresas, das industrias e das administracións públicas. A súa principal misión é contribuír ao fortalecemento e potenciación da competitividade no ámbito industrial e empresarial e apoiar a innovación no sector produtivo, mediante o logro da excelencia na investigación e o desenvolvemento de tecnoloxía matemática avanzada orientada á transferencia á industria. Integra a participación de nove grupos de investigación en Matemática Aplicada, Estatística e Investigación Operativa, das universidades da Coruña, Santiago de Compostela e Vigo, o que lle permite un intercambio continuo de coñecemento con case cento cincuenta investigadores de alto nivel e con gran experiencia en dar resposta a demandas do ámbito industrial. Da USC, colaboran con catro destes nove grupos de investigación, o grupo Interdisciplinar de Estatística, Computación, Medicina e Bioloxía (GRID[ECMB]) coordinado pola catedrática de Bioestadística Carmen Cadarso Suarez; o de Enxeñería Matemática (mat+i) coordinado polo catedrático de Matemática Aplicada Alfredo Bermúdez de Castro; o grupo Modelos de Optimización, Decisión, Estatística e Aplicación (modestya) coordinado polo catedrático de Estatística e Investigación Operativa Wenceslao González Manteiga; e o de Modelos Matemáticos e Simulación Numérica en Mecánica de Sólidos (MOSISOLID) coordinado polo catedrático de Matemática Aplicada e reitor electo Juan Manuel Viaño Rey. O presidente de ITMATI e vicerreitor de Investigación e Innovación, Francisco González García, asegura na súa carta de presentación desta memoria de actividades o seu convencemento en que "a posta en marcha deste consorcio xogará nos próximos anos un papel crucial na renovación, baseada en criterios científicos, do noso tecido produtivo”.