O IV Curso de Dereito Privado e Integración Europea comeza o vindeiro luns na Facultade de Dereito

A IV edición do Curso de Dereito Privado e Integración Europea comeza o vindeiro luns, día 26, na Facultade de Dereito, organizado pola Área de Dereito Mercantil da USC xunto coa Comisión Europea e a Consellería de Innovación e a colaboración do Centro de Documentación Europea da USC. As persoas interesadas en asistir a estas sesións, con carácter multidisciplinar e introdutorio, poden matricularse ata a mesma xornada de inicio. Os alumnos da USC inscritos poderán validar ata 3,5 créditos de libre configuración pola participación nas actividades deste encontro.
As clases, que se desenvolverán dende o 26 de febreiro ata o 2 de marzo en horario vespertino no centro onde se inauguran, teñen como obxectivo difundir o coñecemento do proceso de integración europea a través da análise dos contratos, publicidade, marcas, patentes, prácticas comerciais desleais e o análise do que significa a integración do vello continente.
Programa do cursoProfesores da USC, a Universidade de Vigo, a Universidade Bayreuth e a London School of Economics participarán neste curso que abrirá coa presentación do mercado interior abordando o estudo dos tratados e liberdades básicas. Nos seguintes días os docentes explicarán a protección da propiedade industrial, as marcas na Unión Europea, a publicidade en internet e no mercado interior, o Dereito de Consumo na Unión Europea, as condicións xerais da contratación e a protección do consumidor, entre outras cuestións.
O curso celebrará unha sesión extraordinaria o 20 de abril na que participarán o decano da Facultade de Dereito da London School of Economics, Hugh Collins, e o catedrático de Dereito Privado da Universidade de Bayreuth, Stefan Leible. Os alumnos que non posúan competencias en lingua inglesa poderán optar por realizar unha actividade práctica alternativa.