Matemáticas acolle a European Study Group with Industry e a II Iberian Modelling Week
Esta semana estanse a celebrar na Facultade de Matemáticas da USC a 110A European Study Group with Industry (ESGI) e a II Iberian Modelling Week, en cuxa organización participan investigadores da USC e do Instituto Tecnolóxico de Matemática Industrial (Itmati) e cuxa inauguración conxunta presidiu o reitor Juan Viaño, acompañado na mesa presidencial do director da Axencia Galega de Innovación, Manuel Varela Rey; da decana da Facultade, Victoria Otero Espinar; o catedrático Laureano Escudero Bueno, en representación do Comité Científico; Manuel Cruz, representante da Rede Portuguesa de Matemática Industrial e Innovación; e da profesora Elena Vázquez Cendón. ESGI O European Study Group with Industry é un encontro entre a industria e a comunidade matemática iniciado en Oxford en 1968, que segue vixente hoxe como un dos métodos máis eficaces e de maior recoñecemento internacional en materia de transferencia de tecnoloxía e coñecemento. Varias empresas presentarán un reto en formato de problema matemático detectado na súa actividade e que podería ser tratado con tecnoloxía matemática. Concretamente participarán representantes de Repsol, Reganosa ou do CIS Madeira. A formulación que realizará Repsol está relacionada coa mellora dos sistemas de almacenamento enerxético con aplicación en mobilidade sostible, entre os que se inclúen as baterías de ion-litio para coches eléctricos. As baterías son sistemas complexos que esixen recursos computacionais moi importantes para realizar simulacións rigorosas do seu funcionamento e así obter equipos de maior duración, máis seguras e protocolos mellorados de recarga rápida. A incorporación das mais modernas técnicas matemáticas é clave en moitos outros procesos e o reto que presenta Repsol esta semana, é un dos exemplos cos que traballa dende a Unidade Mixta de Investigación Repsol-ITMATI. Polo que respecta á empresa Reganosa, esta recibe, almacena e transforma Gas Natural Licuado (GNL) a través da súa terminal de Mugardos, no porto de Ferrol, e precisa anticiparse ás necesidades do mercado español. E é que “o mercado enerxético é realmente complexo” apunta Laurent Moriceau, responsable de Regulación Europea en Reganosa, “e unha maior precisión sobre as previsións de importacións de GNL é clave para que as infraestruturas poidan cubrir a demanda na cantidade necesaria e no momento adecuado”. Ademais destas dúas grandes empresas, neste workshop participa o Centro de Innovación e Servizos Tecnolóxicos dependente da Axencia Galega de Innovación (Xunta de Galicia), CIS Madeira (GAIN), que se propón mellorar o proceso de secado do pino galego. “ A modelización matemática permitiranos prever a influencia da velocidade do aire, a temperatura e a colación da madeira durante o proceso de secado e evitar múltiples e custosos experimentos nos nosos secadoiros”, explica Xosé Francisco Pedras, técnico de CIS Madeira. “Neste foro vamos a aforrar moito tempo e esperamos ter datos en poucos meses como para reformular o proceso, en concreto, esperamos poder afinar tanto como para reducir o tempo de secado e o consumo enerxético entre un 20 e un 30 por cento; e axudar a aumentar así a competitividade das empresas do sector da madeira”. Tras catro días de traballo, “as empresas esperan atopar unha solución ao ter esbozado unha liña de colaboración para a súa resolución a curto oumedio prazo. Estes resultados presentaranse o día 2 de xullo, durante a xornada de conclusións deste encontro entre científicos industriais e investigadores matemáticos”, explica Peregrina Quintela, directora de ITMATI e presidenta de Math-in. Modelización En paralelo a ESGI, unha vintena de novos investigadores e académicos reúnense na II Iberian Modelling Week, que terá lugar entre os días 29 de xuño e 3 de xullo, tamén en Santiago. Buscar solucións a problemas industriais a través da matemática aplicada, a estatística e a investigación operativa é xa un perfil profesional que se demanda no mercado laboral. “Máis que un novo perfil tratase dun perfil que se está consolidando” apunta Elena Vázquez Cendón, profesora titular de Matemática Aplicada na Universidade de Santiago de Compostela e investigadora adscrita a ITMATI, e coordinadora do Máster de Matemática Industrial (M2i). Como engade, “a taxa de empregabilidade destes profesionais supera o 80% e, durante os dous últimos anos marcados pola crise, o soldo medio mellorou ao igual que a calidade dos empregos”, conclúe. Este evento, coorganizado entre ITMATI, a Rede Española Matemática-Industria (math-in) e a Rede Portuguesa de Matemática para a Industria e a Innovación (PT-MATHS-IN), reúne a estudantes de másteres de matemáticas como o Interuniversitario en Matemática Industrial (M2i) e o Interuniversitario en Técnicas Estatísticas, ambos orientados á resolución de problemas industriais. Investigadores e empresas buscarán respostas a problemáticas cotiás da industria. Foto: Servimav-USC
