Unha mostra en Filoloxía repasa a vida e obra de Carolina Michaëlis de Vasconcelos

A modo de exposición bibliográfica e documental, a mostra ‘A vida e obra de Carolina Michaëlis de Vasconcelos. Evocación e homenaxe’ pretende render homenaxe á considerada como gran mestra da filoloxía galega e portuguesa, romanista e á que fora a primeira doutora en Letras e primeira profesora da Universidade de Coimbra.

Esta exposición inaugúrase este martes 15 ás 19:00 no Salón de Graos da Facultade de Filoloxía, a onde chega cedida pola Universidade de Coimbra ata o próximo 13 de abril. Ao acto inaugural asisten os vicerreitores de Extensión Universitaria, Cultura e Sociedade e de Grao e Posgrao, Javier Garbayo e Eva Castro, respectivamente; o decano da Facultade de Filoloxía, Ernesto González Seoane; o director do Departamento de Filoloxía Galega, Francisco Cidras; e diversas autoridades académicas da Universidade de Coimbra.

Na mesma sesión, a responsable da coordinación científica da mostra, a profesora Maria Manuela Gouveia Delille, pronunciará a conferencia titulada ‘Carolina Michaëlis de Vasconcelos: as três grandes fases
da sua vida e da sua obra’.

Aberta ao público na Biblioteca da Facultade de Filoloxía, a mostra percorre a vertente persoal e académica da insigne filóloga, considerando tres grandes períodos, os que se corresponden coas tres grandes etapas da súa vida e obra, Anos de Berlín (1851-1876), Anos do Porto (1876-1912) e Anos de Coimbra e do Porto (1912-1925).

A través de paneis explicativs e de libros e documentos, móstrase o labor filolóxico de Carolina Michaëlis de Vasconcelos, o seu perfil como estudosa e investigadora e as relacións que mantivo cos círculos eruditos do momento. Ilústrase paralelamente o seu perfil como muller, “unha muller culta, á vangarda da súa época, que asumiu un firme compromiso coa promoción do ensino e coa mellora das condicións de vida das mulleres nun período crucial para a historia de Occidente”, engaden as comisarias da exposición Mariña Arbor e Mª Isabel Morán.