Pablo Ramil releva a López Mosquera na dirección do Ibader, que suma ao seu consello de goberno a Piñeiro Chousa e Neira Seijo

O profesor do Departamento de Botánica da USC Pablo Ramil Rego relevará na dirección do Instituto de Biodiversidade Agraria e Desenvolvemento Rural (Ibader) da USC a Elvira López Mosquera, tal e como acordou este venres o consello de goberno deste instituto universitario con sede no campus de Lugo, no marco dunha reunión ordinaria presidida polo reitor da USC, Juan Viaño. A reunión do consello de goberno do Ibader, un instituto universitario de carácter mixto creado en 2001 e do que forman parte a USC, a Xunta de Galicia, a través das consellerías de Medio Rural e Medio Ambiente e Ordenación do Territorio, e a Deputación Provincial de Lugo, serviu tamén para lembrar a recente incorporación dos profesores da USC Juan Ramón Piñeiro Chousa e Xan Xosé Neira Seijo como novos membros do consello de goberno do Ibader. A presentación e posterior aprobación das memorias anuais de actividades desenvolvidas polo Instituto de Biodiversidade Agraria e Desenvolvemento Rural da USC nos exercicios 2013 e 2014 foi, ademais doutros asuntos de trámites, outra das cuestións tratadas este venres no consello de goberno do Ibader. O vicerreitor de Desenvolvemento Científico e Tecnolóxico do campus de Lugo, Andrés Barreiro; o subdelegado Xeral de Prevención e Defensa contra Incendios Forestais da Consellería de Medio Rural, Miguel Ángel Cela; a xefa de servizo de Conservación da Natureza en Lugo, María Eugenia Gasalla, e o profesor da USC e secretario do Ibader, Antonio Iglesias Becerra, tamén participaron nesta xuntanza ordinaria do consello de goberno do Instituto de Biodiversidade Agraria e Desenvolvemento Rural en Lugo.