Ir o contido principal

Persoal investigador do Instituto da Lingua Galega da USC elabora un dicionario de pronuncia

Persoal investigador do Instituto da Lingua Galega da USC elabora un dicionario de pronuncia
Persoal investigador do Instituto da Lingua Galega da USC elabora un dicionario de pronuncia

O Instituto da Lingua Galega (ILG) e a Real Academia Galega acaban de publicar o Dicionario de pronuncia da lingua galega , elaborado por Xosé Luís Regueira, investigador do ILG e profesor do departamento de Filoloxía galega da USC, e no que colaborou un equipo de investigadores do mesmo instituto. Partindo das formas contidas no Vocabulario ortográfico da lingua galega (VOLG) o volume fornece transcricións fonéticas para 47.000 palabras cunha proposta de pronuncia modelo que ten en conta toda a información fonética coñecida da lingua galega. A proposta de pronuncia modelo fíxose seguindo os mesmos criterios que orientaron a elaboración do estándar escrito, nomeadamente a fidelidade á lingua falada, o carácter supradialectal e a harmonía coa lingua portuguesa. Este dicionario é unha ferramenta relevante para a normalización do galego galega xa que permite establecer un modelo de pronuncia estándar utilizable na aprendizaxe, nos medios orais de comunicación e noutros ámbitos de difusión da lingua. Diríxese, polo tanto, a aprendices tanto galegos coma foráneos, a todos os profesionais que necesiten facer uso dunha pronuncia estándar - xornalistas, dobradores e actores- así como a todos os usuarios dos recursos lexicográficos do galego. O dicionario, editado conxuntamente polo Instituto da Lingua Galega da USC e pola Real Academia Galega, conta coa axuda financeira da Secretaría Xeral de Política Lingüística.

Os contidos desta páxina actualizáronse o 22.10.2010.