Pescaenverde sensibiliza dende o Mercado de Abastos compostelá sobre o impacto da pesca no medio ambiente
Pescaenverde, a ecoetiqueta que promove prácticas pesqueiras amigables co medio ambiente, presentouse este xoves 21 no Mercado de Abastos de Santiago de Compostela. A certificación conta co respaldo científico do Grupo de Investigación de Biotecnoloxía Ambiental da USC, dirixido por Gumersindo Feijoo, vicerreitor de Transformación Dixital e Innovación quen explicou o valor da ecoetiqueta xunto a Marta Rey, xerente do Mercado de Abastos. Pescaenverde é unha ecoetiqueta que achega información ao consumidor sobre o impacto que os produtos pesqueiros teñen sobre o medio ambiente, “ao mesmo tempo que achega un valor engadido aos produtos que incorporan a marca”, explicou o profesor da USC.
Para conseguir esta ecoetiqueta as empresas deben obter unha certificación que abrangue a Pegada de Carbono e a Taxa de Retorno Enerxético ao longo do ciclo de vida do produto, dende a captura do peixe ata a súa chegada á lonxa. Esta iniciativa busca favorecer a venda nun mercado altamente competitivo á vez que contribúe á xestión sostible dos procesos produtivos do sector pesqueiro dende perspectivas ambientais e económicas.
A presentación permitiu destacar a importancia da certificación Pescaenverde na industria pesqueira, resaltando o seu respaldo científico e fomentando a adopción de prácticas máis sostibles. A sesión permitiu sensibilizar o público sobre a importancia de elixir produtos certificados e representou un paso crucial para o coñecemento por parte das persoas consumidoras dos beneficios das eco-etiquetas de produtos do mar e a promoción do desenvolvemento sostible do sector pesqueiro galego.
