Presentación dunha nova etapa editorial da revista estudantil da Facultade de Filoloxía 'Nova Ólisbos. Amantes da palabra'

A revista estudantil da Facultade de Filoloxía da USC Nova Ólisbos. Amantes da palabra presentará o vindeiro luns, día 5, en roda de prensa, a súa nova etapa editorial. A presentación desenvolverase nun acto a celebrar a partir das 12:00 horas na Sala de Prensa do Colexio de Fonseca.
Ao acto asistirán o vicerreitor de Comunidade Universitaria e Compromiso Social da USC, José M. Mayán Santos; o decano da Facultade de Filoloxía, Ernesto González Seoane; e os directores da publicación, Roberto Pascual e Xandra Santos.
Esta nova andaina de Ólisbos recupera o que fora un exitoso medio de expresión nacido nos anos 80 e que chegou a publicar un total de dezanove números. A publicación renace, segundo os seus promotores coa vontade de ser “unha plataforma aberta e plural para a xente nova e con iniciativa”.