Presentación do XII Curso de Primavera da USC e do XIII Encontro Universitario de Danza na vicerreitoría de Lugo

A vicerreitora de Servizos Culturais do campus de Lugo, Carme Silva Domínguez; a concelleira de Cultura do Concello de Lugo, Carmen Silva, e o deputado delegado da área de Cultura da Deputación Provincial de Lugo, Xosé Ferreiro, presentarán este venres 8 de abril, ás 10.30 horas, na sala de prensa da Vicerreitoría de Coordinación do campus de Lugo, a décima segunda edición do Curso de Primavera da USC, que se desenvolverá do 19 ao 22 e abril na Facultade de Humanidades baixo o título 'Cultura e humor' e o XIII Encontro de Danza Universitaria, un programa artístico que levará os días 22 e 23 de abril ata cinco coreografías de danza contemporánea ás instalacións do Museo Interactivo da Historia de Lugo (MIHL).

A profesora do Departamento de Filosofía da USC na Facultade de Humanidades María Xesús Vázquez Lobeiras, quen coordina xunto co catedrático Alexandre Veiga a organización do XII Curso de Primavera, e o director do Espazo de Danza da USC, Juan Carlos Zahera, tamén participarán no acto de presentación destes dous programas organizados ao abeiro do convenio Lugo Cultural, que recibe financiamento da Deputación Provincial de Lugo, do Concello de Lugo e da USC e que reforzarán a oferta cultural na capital luguesa durante a segunda metade do mes de abril.