O profesor Luis Castedo presentará en universidades mexicanas os últimos traballos da USC no ámbito da Química Orgánica

O profesor Luis Castedo inicia este mércores 23 unha estadía en diversas universidades mexicanas a onde foi convidado a impartir unha serie de conferencias, así como a manter encontros con investigadores deste país. Concretamente, o investigador da USC viaxa convidado pola Universidade Autónoma de México, o Instituto Politécnico Nacional da cidade de México, e as universidades Autónoma do Estado de Hidalgo en Pachuca e Micoacana de San Nicolás en Morelia. As intervencións programadas presentarán no outro lado do Atlántico os traballos de investigación que no eido da Química Orgánica se están a desenvolver na institución académica compostelá. Ademais, a viaxe permitirá a celebración de diversos encontros con científicos das institucións promotoras da viaxe co obxecto de planificar futuras colaboracións.

A primeira das citas será o venres 25 na Universidade Autónoma do Estado de Hidalgo, o día 28 na Autónoma de México e o día 30 no Instituto Politécnico Nacional. Este ciclo de conferencias científicas rematará o día 1 de febreiro na Universidade Michoacana. Ademais, do interese científico das distintas intervencións, o profesor Castedo aproveitará a súa estadía en México para lembrar á figura académica de Antonio Madinaveitia, pai científico de Ignacio Ribas e do discípulo deste, o propio Luis Castedo.