Récord de inscricións no obradoiro de HTML5 organizado por investigadores do CiTIUS

As aulas de informática da Escola Técnica Superior de Enxeñaría acolleron este venres a segunda sesión do curso sobre HTML5 organizado polos investigadores do CiTIUS Eduardo Sánchez Vila e Alberto Bugarín Diz e impartido pola empresa tecnolóxica TeslaTechnologies fundada por titulados en Enxeñaría Informática da USC. O curso, dirixido a alumnado dos distintos másters ou graos da área TIC, superou todas as previsións dos seus organizadores ao superarse a cota das 40 prazas ofertadas. O seu obxectivo é fixar unha serie de conceptos esenciais para aprehender unha base axeitada sobre a que construír proxectos de maior complexidade. Algúns destes conceptos xiran en torno ao acceso e mantemento de datos off-line, a xestión de información de xeolocalización utilizando o dispositivo GPS do móbil, a integración de audio e vídeo, a creación de animacións básicas 2D ou o desenvolvemento de elementos HTML5 con JavaScript e CSS3.