O taller sobre 'Papiroflexia e matemáticas: poliedros estrelados', nova cita do ciclo 'Unha andaina polas Matemáticas'

O ciclo ‘Unha Andaina polas Matemáticas’ desenvolverá a vindeira semana, os días 5 e 8, o taller ‘Papiroflexia e matemáticas: poliedros estrelados’ que impartirán os docentes Covadonga Blanco García, Fernando Lazo Pérez e María Teresa Otero Suárez, todos eles membros da Asociación Española de Papiroflexia. As dúas sesións celebraranse a partir das 18:00 horas na Aula Magna da Facultade de Matemáticas.
Nesta nova edición, o ciclo ‘Unha andaina polas Matemáticas mantén a súa intención de mostrar aos participantes a evolución histórica dalgúns conceptos matemáticos, a importancia de resultados clásicos e modernos, así como as aplicacións dalgunhas teorías básicas, tanto nas propias matemáticas como na arte, arquitectura, bioloxía, ciencias sociais, enxeñaría, ou na música. Este ciclo, de carácter formativo e divulgativo, é unha iniciativa do Departamento de Xeometría e Topoloxía da Facultade de Matemáticas da USC.
A vindeira cita do ciclo será o día 12 de marzo ás 17:00 horas na Aula Magna da facultade compostelá e nela Manuel Ladra González, do Departamento de Álxebra da USC, ofrecerá o relatorio ‘Tres problemas famosos’.
Tres créditos de libre configuraciónOs estudantes da USC inscritos poderán validar un total de tres créditos de libre configuración pola súa asistencia e participación nun mínimo de nove das dez sesións programadas. No seu conxunto, o ciclo articúlase nunha serie de dez conferencias ou seminarios cunha duración de entre 120 e 180 minutos. Os conferenciantes serán docentes e investigadores universitarios procedentes da propia USC e de centros do País Vasco, Valladolid ou Granada, así como profesores do ensino secundario.