Unha tese en Enfermaría profunda na prevención e a atención ao afogamento
A tese do graduado en Enfermaría Roberto Barcala Furelos aborda a procura de evidencias sobre a prevención e a atención ao afogamento e inclúe unha revisión sistemática, unha guía de consenso para a actuación dos socorristas durante unha pandemia e catro estudos con socorristas con metodoloxías de simulación. O traballo foi merecedor da máxima cualificación e vén ampliar o abano de traballos de doutoramento realizados por graduados/as da Facultade de Enfermaría da USC, reflexo da crecente incorporación desta área aos estudos de doutoramento e ás actividades de investigación.
Na súa investigación, o doutor Barcala identifica catro perfís de rescatadores ‘lego’ -de primeiro auxilio- con diferentes niveis de habilidades, ademais de analizar tamén a constatación dos efectos da electroestimulación na recuperación dos socorristas, a visibilidade das manobras de reanimación cardiopulmonar nunha moto de auga de rescate e a potencial utilidade das mantas plásticas e outros sistemas de protección persoal na reanimación de persoas afogadas tanto en terra firme como nunha embarcación durante a pandemia por COVID-19.
Roberto Barcala é membro dos grupos de investigación Clinursid da USC, Sicrus do Instituto de Investigación Sanitaria de Santiago e Remoss da UVigo. A tese, realizada por compendio de seis publicacións científicas en revistas de impacto bibliométrico -catro delas internacionai- foi dirixida polos profesores Antonio Rodríguez Núñez e Santiago Martínez Isasi, da Área de Enfermaría. O tribunal que xulgou o traballo integrábano Joost Bierens, da Universidade Vrije de Bruxelas; Robert Greif, da Universidade de Berna; e Felipe Fernández Méndez, da Universidade de Vigo.