A Universidade de Santiago analiza as causas e consecuencias da pobreza na actualidade

Máis de 3.000 millóns de persoas carecen dunha vida digna, 1.100 millóns non dispoñen de auga potable e 2.000 millóns non teñen acceso á enerxía eléctrica. Para proporcionar unha visión global das causas e consecuencias da pobreza na actualidade, o Servizo de Participación e Integración Universitaria da USC organiza a segunda edición do ‘Curso de Tecnoloxía e Cooperación para o Desenvolvemento Humano’ en colaboración coa Xunta de Galicia e Enxeñaría Sen Fronteiras.
As xornadas, que se celebraran os días 9, 10, 11, 23, 24 e 25 de marzo tanto na Escola Técnica Superior de Enxeñaría do Campus de Santiago coma na Escola Politécnica Superior de Lugo cos mesmos contidos, darán a coñecer os modelos alternativos de desenvolvemento e amosarán distintos enfoques da cooperación para o desenvolvemento. As sesións académicas serven para destacar a importancia da enxeñaría como unha ferramenta esencial que facilitará o acceso universal aos servizos básicos.
Destinado a todas as persoas interesadas en cooperación e desenvolvemento, o curso inaugurarase o venres, día 9, ás 12:00 horas coa conferencia da psicóloga social colombiana e investigadora de USC, Mónica Alzate, titulada ‘Consecuencias do subdesenvolvemento no Sur: inmigración e conflitos’. A continuación, ás 13:00 horas, a voluntaria e representante de Médicos do Mundo en Galicia, Nieves Turienzo, falará sobre o ‘Cuarto Mundo ou a pobreza do Norte’.
Xa pola tarde, ás 16:00 horas, o catedrático do Departamento de Economía Aplicada da USC, Ramón López, explicará qué é o subdesenvolvemento. Deseguido, o profesor da Área de Dereito Internacional Público e Relacións Internacionais da USC, Carlos Teijo, analizará a evolución e situación actual do desenvolvemento mundial. Como peche da primeira xornada do curso, ás 18:00 horas, o profesor da mesma área, Rafael García, falará sobre a axuda internacional para o desenvolvemento destacando o papel dos gobernos, organismos financeiros, universidades e ONGD’s.
Durante as seguintes xornadas, o curso abordará temas como as culturas indíxenas, os novos movementos sociais no Norte e no Sur, a perspectiva de xénero, o medio ambiente, a educación para o desenvolvemento, a análise territorial dos asentamentos humanos, a auga e saneamento, as enerxías renovables, o software libre ou o desenvolvemento agropecuario, entre outros.