Ir o contido principal

As universidades públicas galegas e as organizacións sindicais acordan iniciar a negociación do terceiro convenio colectivo do persoal docente laboral

Representantes das tres universidades e das organizacións sindicais alcazaron estes acordos nun encontro da Reitoría compostelá
Representantes das tres universidades e das organizacións sindicais alcazaron estes acordos nun encontro da Reitoría compostelá
Acordaron igualmente a actualización transitoria do actual convenio aos cambios normativos producidos nos últimos anos, particularmente á Lei Orgánica do Sistema Universitario
Lugo, Santiago de Compostela

Representantes das tres universidades públicas do Sistema Universitario Galego (SUG) e das catro principais organizacións sindicais con representación no SUG acaban de asinar un acordo para o inicio do proceso de negociación do terceiro convenio colectivo do profesorado laboral das universidades galegas.

A negociación comezará coa constitución a finais de febreiro dunha mesa paritaria que conformarán 15 representantes por parte das universidades (cinco por cada unha das universidades públicas) e outros 15 por parte de CIG, CCOO, UGT e CSIF, en función do seu número de representantes nos órganos de representación.

Nun encontro celebrado na USC, universidades públicas galegas e organizacións sindicais acordaron igualmente a actualización transitoria do actual convenio colectivo do profesorado laboral -o segundo do SUG, asinado en 2011- aos distintos cambios normativos producidos nos últimos anos en material laboral e, particularmente, á Lei Orgánica do Sistema Universitario (LOSU). Ademais, neste senso, tamén se acordou recuperar a cláusula de xubilación forzosa que existía neste segundo convenio colectivo e que quedou sen efecto en 2015 por unha modificación do Estatuto dos Traballadores.
 

Os contidos desta páxina actualizáronse o 10.02.2025.