A USC inaugura este mércores a exposición 'Sigillum. Memoria e Identidade da Universidade de Santiago de Compostela'

A través de retratos e vítores dende o fundador da USC, Alonso III de Fonseca, a Castelao, pasando por ilustres personaxes reais, a USC achegará a súa propia historia ao visitante da exposición ‘Sigillum. Memoria e Identidade da Universidade de Santiago de Compostela’ que se inaugurará este mércores, día 7, na Igrexa da Universidade.
Na mostra poderase ver nun total de 33 obras -retratos, vítores- unha galería de personaxes que son só unha pequena mostra dos máis destacados nomes dos fundadores, profesores ou estudantes dos cinco séculos de historia da Universidade compostelá. A exposición permitirá apreciar ademais o resultado do proceso de restauración ao que foron sometidas moitas destas pezas polo equipo da USC, destacando deste xeito a aposta desta Universidade pola conservación do seu patrimonio.