A USC lembra a Uxío Novoneyra nun acto literario co gallo do Día das Letras Galegas 2010

‘Semblanza de Uxío Novoneyra’ é o título da conferencia que este martes 11 pronunicou o catedrático de Filoloxía Galega, Anxo Tarrío Varela, no transcurso do acto literario que a USC organizou co gallo do Día das Letras Galegas 2010.
Baixo a presidencia do reitor Senén Barro, o acto celebrouse no Salón Nobre do Colexio de Fonseca coa asistencia ademais do presidente do Consello Social, Manuel Puga Pereira; da vicerreitora de Cultura, Elvira Fidalgo; e do director do Departamento de Filoloxía Galega, Francisco Cidrás. Este último foi o encargado de presentar o volume ‘Uxío Novoneyra. Día das Letras Galegas 2010’.
Os EidosA USC sumouse en 2010 á conmemoración do Día das Letras Galegas coa publicación en facsímile, por vez primeira, do manuscrito autógrafo que Uxío Novoneyra compuxo entre 1952 e 1954 do seu poemario Os Eidos, publicado por Galaxia en 1955.
Cualificado polos responsables do Servizo de Publicacións da USC como unha auténtica “xoia bibliográfica”, en Uxío Novoneyra. Día das Letras Galegas 2010, o poeta converte cada composición “nun auténtico e fermoso caligrama” que os editores da USC trataron “coa maior delicadeza para conseguir unha representación fiel nos máis mínimos detalles do orixinal, un humilde bloc dos que correntemente se mercan nas tendas de papelarías”.
Tal e como se recolle na introdución da obra, o manuscrito contén a base e fundamento primordial do que había ser todo un ciclo poético que o propio poeta comezaría a pechar coa edición de Os eidos. Libro do Courel, onde reúne os poemas d’Os eidos (1955) e d’Os eidos-2 (1974).
Branca Novo, filla do poeta, considera que Os eidos representa unha “experiencia intensísima sobre a terra”, tratando o agoiro da desaparición do espazo rural. Neste contexto e neste exercicio de “recuperación do que somos”, Uxío Novoneyra explorou “a lingua como única forma de supervivencia”, engade a súa filla.
O libro complétase cun conxunto de estudos de diversos profesores do Departamento de Filoloxía Galega, entre os que se atopan Jesús Alonso Montero, José L. Forneiro, Blanca Roig, e Mª Xesús Nogueira e Carme Silva. Os traballos recollidos “axudan a comprender mellor o labor literario e cultural de Uxío Novoneyra”. Tal e como sinala o coordinador do volume, o profesor Anxo Tarrío, a obra presentada é “o xusto recoñecemento para o poeta que mellor soubo refrear a fervenza das palabras que estas saísen xustas e precisas”.
O mesmo Tarrío define a obra de Novoneyra como un “iceberg poético” que, “deixándonos escoitar tan só unhas poucas palabras, agocha en profundidade un universo do que cada lector terá que tirar o seu propio paraíso ou inferno, sempre por terras liberadas”.