A USC oferta en Santiago e Lugo cursos de teatro e a posibilidade de ingresar nas compañías dos dous campus
A USC presenta para este curso unha oferta de formación teatral nos campus de Santiago e Lugo que abrangue desde a iniciación ao teatro á interpretación, a dirección teatral ou a escrita dramática, coa posibilidade de ingresar ademais nas compañías teatrais dos dous campus.
En Santiago, a oferta formativa concrétase nun curso de iniciación ao teatro, na Escola de Teatro e no Laboratorio de Escrita Dramática. Ademais, as persoas que conten coa formación requirida terán a posibilidade de ingresar na Compañía de Teatro da USC. O xoves 19 de setembro a partir das 20.00 horas terá lugar na Sala de Teatro Roberto Vidal Bolaño (Auditorio da Universidade, Campus Sur) a presentación do programa da Aula de Teatro para o curso 2024/25. Trátase dun encontro aberto a todas as persoas interesadas na actividade teatral, desde a formación ata a produción escénica, no que se debullarán as actividades a desenvolver durante este curso académico e no que se poderá preguntar e resolver calquera dúbida a respecto do traballo a realizar: probas de acceso, matrículas, contidos ou profesorado, entre outras.
O luns 23, o martes 24 e o mércores 25 de setembro de 2024 a mesma sala acolle desde as 18.00 horas as probas de acceso da Aula de Teatro, unha convocatoria para a que non se precisa ter experiencia previa e onde se realizan unha serie de exercicios e entrevistas para coñecer o perfil das persoas que se presentan e o seu interese específico, por exemplo iniciarse na arte dramática ou avanzar en coñecementos, e así poder suxerirlles os espazos onde mellor poden estar: compañía de teatro, escola de teatro e/ou cursos de iniciación ao teatro.
O luns 30 de setembro abre o prazo de matrícula na Escola de Teatro e nos Cursos de Iniciación ao Teatro. Unha vez confirmada a admisión nos diferentes espazos cada persoa interesada poderá formalizar a súa matrícula ata o 7 de outubro enviando un correo electrónico a area.cultura [at] usc.gal (area[dot]cultura[at]usc[dot]gal). O inicio da actividade teatral na Compañía de Teatro, na Escola de Teatro e nos Cursos de Iniciación ao Teatro será o luns 7 de outubro.
Campus de Lugo
No campus de Lugo ofértase un taller de arte dramática para persoas interesadas que se desenvolverá entre o 2 de outubro e o 18 de decembro e outro orientado para o colectivo do IV Ciclo universitario que terá lugar do 7 de outubro ao 16 de decembro. A apertura do prazo de matrícula nos cursos de teatro que se van desenvolver na cidade de Lugo será o luns 16 de setembro e a última xornada para matricularse será o luns 30 de setembro.
Así mesmo, as persoas integrantes da comunidade universitaria que o desexen poderán solicitar inscribirse na Compañía de Teatro da USC-Lugo, sendo 10 o número de prazas dispoñibles. O período de ensaio comeza no mes de xaneiro, concretándose os horarios coas persoas integrantes da compañía, e a previsión de estrea da montaxe teatral e xira é o mes de abril.