A USC porá en marcha dez proxectos de cooperación interuniversitaria e investigación científica con Iberoamérica
A Axencia Española de Cooperación Internacional (AECI) concedeulle á Universidade de Santiago un total de dez axudas para a realización doutros tantos programas de cooperación interuniversitaria e investigación científica con Iberoamérica. O número de proxectos concedidos á institución compostelá triplicouse con respecto ao ano pasado, pasando de tres a dez e dun volume orzamentario de 34.750 a 154.448 euros.
Os detalles das axudas concedidas, pertencentes a diferentes áreas de coñecemento, presentáronse hoxe en Fonseca nunha roda de prensa na que participaron o vicerreitor de Relacións Institucionais, Lourenzo Fernández Prieto, e o director da Oficina de Relacións Exteriores, Enrique López Veloso. O obxecto desta convocatoria é constituír e desenvolver redes estables de cooperación científica e de investigación así como de docencia de posgrao ou terceiro ciclo en áreas temáticas prioritarias para a Cooperación Española.
Cinco das dez axudas diríxense a financiar proxectos de investigación que estudarán cuestións relacionadas coa potencialidade do e-learning, nunha iniciativa dirixida por Adriana Gewerc; a conservación da biodiversidade florística dos paxonais altoandinos e o desenvolvemento das poboacións rurais dependentes, cuxo responsable é Jesús Izco Sevillano; a construción de secuencias de ensinanza en ciencias experimentais e matemáticas que dirixirá José Manuel Domínguez Castiñeiras; un estudo transcultural dos menores en risco de desviación social, proxecto encabezado por Ramón Arce; e a mellora da notificación de reaccións adversas a medicamentos a través dunha intervención educativa ensaiada en Arxentina, programa dirixido por Adolfo Figueiras.
No eido da docencia, a USC apoiará dous proxectos dirixidos por Juan Jesús Gestal Otero e que consisten na posta en marcha dunha diplomatura de saúde laboral e dun estudo de minimización de riscos microbiolóxicos no Hospital San Roque de Córdoba (Arxentina); ademais dun posgrao sobre dinámica da formación de estruturas espazotemporais, do que é responsable Alberto Pérez Muñuzuri.
Completan o conxunto dos proxectos aprobados con Latinoamérica un sobre educación a distancia que coordinará Adtiana Gewerc e outro sobre o fortalecemento institucional dos sistemas legais e xudiciais no proceso de integración do Mercosur tomando como modelo a experiencia da UE, responsabilidade de Jorge Pueyo Losa.