A USC publica en facsímile o manuscrito orixinal d'Os Eidos de Novoneyra

A USC sumarase este ano á conmemoración do Día das Letras Galegas coa publicación en facsímile, por vez primeira, do manuscrito autógrafo que Uxío Novoneyra compuxo entre 1952 e 1954 do seu poemario Os Eidos, publicado por Galaxia en 1955.
O exemplar, considerado como unha “xoia bibliográfica”, presentarase aos medios de comunicación este martes 13 na Sala de Prensa do Colexio de Fonseca a partir das 11:00 horas. Na presentación intervirán a vicerreitora de Cultura, Elvira Fidalgo; a filla do poeta, Branca Novo Rey; o coordinador do volume, o profesor Anxo Tarrío; o director académico do Servizo de Publicacións, Antonio Azaustre e o director do mesmo servizo, Juan Blanco Valdés.
O libro complétase cun conxunto de estudos de diversos profesores do Departamento de Filoloxía Galega, entre os que se atopan Jesús Alonso Montero, José L. Forneiro, Blanca Roig, e Mª Xesús Nogueira e Carme Silva.