Unha viaxe polo exótico no Museo de Historia Natural da man de Eugenio Granell

A partir deste xoves o Museo de Historia Natural da USC ofrece a oportunidade de confrontar parte das súas pezas coas pinturas de Eugenio Granell e algunhas obras da súa colección etnográfica. Esta orixinal mostra, derivada da docencia na materia Museoloxía e museografía que imparte o profesor de Historia da Arte Miguel Anxo Rodríguez González, mantén como fío condutor a ollada do pintor surrealista sobre a natureza centroamericana, e en especial coa figura das aves, símbolo para el do exótico e da liberdade.

A mostra, con fondos cedidos pola Fundación Eugenio Granell, pretende facer unha análise comparativa da concepción das formas que ten o pintor fronte ás do público e cómo estas acaban confluíndo cando se coñecen os códigos; en suma, trata de reducir distancias entre a obra e o espectador. A través da figura do paxaro na montaxe faise unha viaxe desde o aviario exótico que conserva o Museo de Historia Natural, pasando pola colección exótica de Granell ata chegar aos seus óleos e debuxos.

Trátase dun traballo de grande complexidade polas investigacións e tarefas que requiriron un grande esforzo do alumnado e que supuxo unha experiencia nova no contextos dos estudios oficiais de Historia da Arte na USC. Así, esta é a primeira experiencia de aplicación real dos coñecementos da materia nun espazo museístico. Os traballos acompañan outra experiencia similar enmarcada na mesma materia e que deu lugar á exposición Artistas na rúa (Casa das Asociacións, Santiago, maio de 2015).

A inauguración de ‘Eugenio Granell: viaxe ao exótico’ terá lugar este xoves 8 ás 20.00 horas no Museo de Historia Natural da USC. A partir de aí poderá visitarse ata o 12 de novembro de martes a sábado en horario de 10:00 a 14:00 e de 16:30 a 20:00 horas, e os domingos e festivos só pola mañá.