Última oportunidade para sumarse ao Campus Terra este curso
Xa estamos en setembro, un mes que para moitas persoas significa o comezo dun novo ano- incluso máis que xaneiro- e dunha nova etapa. Seguro que para os mozos e mozas que este curso inician os seus estudos universitarios aínda o é máis. Por moito que diga o calendario, e aínda que as clases xa deron comezo, nin moito menos está perdido o tren con destino ao desexado futuro.
En forma de estrela fugaz aparece unha oportunidade de ouro para non desaproveitala: o prazo de matrícula extraordinario que terá lugar entre os días 13, 14 e 15 de setembro. Ademais, na nutrida proposta de titulacións do Campus Terra da USC queda algún asento baleiro para voar polo ceo da innovación e a sostibilidade.
Neste senso, a EPS de Enxeñaría dispón de catro formacións universitarias con prazas vacantes. Co fin de desenvolver labores imprescindibles de servizo á sociedade e dotada dunha formación integral nas tres especialidades da profesión (construcións civís, hidroloxía ou transportes e servizos urbanos) atópase o grao en Enxeñaría Civil. Por outra banda, os graos en Enxeñaría Forestal e do Medio Natural e en Enxeñaría Agrícola e Agroalimentaria oriéntanse aos sectores forestal e agrícola.
Igualmente, o grao en Paisaxe está dirixido a crear, manter, protexer e mellorar os lugares co fin de que sexan funcionais e sostibles. Dentro desta constelación da sede de Lugo tamén conta con ocos na Facultade de Ciencias o grao en Enxeñaría de Procesos Químicos Industriais. O seu principal obxectivo é que o alumnado sexa quen de responder ás necesidades existentes no eido da transformación de materias primas, produtos naturais e da actividade industrial.
Se mudamos a posición do telescopio, ben preto podemos ver a Facultade de Humanidades coas portas abertas para darlle a benvida á estrea deste curso: a titulación en Xestión Cultural. As persoas interesadas na arte e o patrimonio, o cine, a televisión ou os videoxogos, aínda están a tempo para despegar con esta proposta académica, tanto na súa modalidade presencial como na semipresencial.
Como última parada neste mapa celestial de vacantes do Campus Terra desprazámonos ata a Escola Universitaria de Relacións Laborais. Neste centro impártese o grao en Relacións Laborais e Recursos Humanos, que procura a formación de profesionais no ámbito do traballo e das súas relacións.
Viaxar polo ceo está ben, pero facelo pola terra das estrelas aínda é mellor.