A Biblioteca Intercentros de Lugo acolle a mostra que conmemora o descubrimento do templo dedicado ao deus Mitra, un dos escasos coñecidos na Península Ibérica e o mellor conservado.
Hai 25 anos tiña lugar na cidade de Lugo un descubrimento arqueolóxico excepcional. Con motivo da reforma do Pazo de Montenegro para convertelo en sede da Vicerreitoría do Campus, atopáronse os restos dunha domus romana moi ben conservada que tiña un mitreo no seu interior. O achado tiña un valor científico notable, pois este templo dedicado ao deus Mitra é un dos escasísimos coñecidos na Península Ibérica e o mellor conservado, polo que se converteu en obxecto de estudo para a investigación internacional.
A Biblioteca Intercentros de Lugo súmase ao programa de actividades de conmemoración do evento coa exposición ‘Un achado excepcional: 25 anos da Domus do Mitreo’. A través de 12 paneis con fotografías, moitas delas inéditas procedentes do arquivo do arqueólogo-director, C. Rodríguez Cao, mostrarase a súa evolución desde a escavación ata a musealización. Poderá verse a complexidade da escavación e da restauración do seu material, a investigación e o museo actual. A exposición amplíase co centro de interese formado polos fondos bibliográficos vinculados coa temática da mostra. Situados no vestíbulo da Biblioteca, permanecerán accesibles durante os meses de maio e xuño en horario de apertura das instalacións.
En canto ao museo, vén de ser recentemente incorporado á Rede Museística de Galicia. A inserción desta entidade fundaméntase no seu papel esencial na salvagarda e conservación dos obxectos atopados no xacemento arqueolóxico sobre o que se sitúa, así como no feito de que se garante a integridade dos bens culturais ao tempo que se compatibiliza a súa conservación coa visita pública.
