O Campus Terra promove a innovación e o emprendemento xuvenil no marco da economía azul co proxecto ATLIC

O Campus Terra da USC promove e impulsa a innovación e o emprendemento da mocidade no marco do a economía azul ao abeiro do proxecto Atlantic Innoblue Communities (ATLIC), un programa europeo liderado por Vía Láctea, promovido por entidades e institucións de España, Francia, Irlanda e Portugal no que o campus de especialización da USC asentado en Lugo colabora como asociado, segundo indicou a delegada do reitor da USC para o Campus Terra, a profesora Mª Elvira López Mosquera, na sesión inaugural de ATLIC celebrada en xaneiro no o complexo LUG2, na que participaron decenas de mozas e mozas, boa parte deles estudantes universitarios.

A creación dun novo enfoque para a innovación e o emprendemento xuvenil no desenvolvemento da economía azul do Espazo Atlántico centra o principal obxectivo co que botou a andar o proxecto ATLIC, unha iniciativa transnacional, na que tamén participa a incubadora Lug Open Factory, e que aspira a construír unha comunidade azul piloto de innovación atlántica a través da activación de laboratorios abertos de innovación, transferencia de coñecemento, creación de capacidades e redes de apoio. Os resultados acadados nestas sesións poderían servir  para desenvolver ou, no seu caso, desenvolver solucións de mercado a desafíos comúns das rexións do chamado espazo atlántico, segundo se recolle nas bases deste programa Interreg.

O enfoque do proxecto, estruturado en sesións de formación activa dirixidas a mocidade de entre 16 e 30 anos e que se prolongarán durante tres anos, busca optimizar e aglutinar as sinerxías entre mocidade, pemes, institucións públicas e privadas en aras a un desenvolvemento económico sostible que favoreza a innovación e a creación de novas oportunidades de emprego.

As achegas que pode realizar o Campus Terra neste eido son múltiples, tal e como explicou á comunidade xuvenil reunida en Lugo Elvira López Mosquera. A delegada do Reitor da USC neste campus de especialización da USC presentou a dilatada experiencia que atesoura a sede universitaria en programas de emprendemento universitario, tanto os promovidos por iniciativas privadas como a través de convocatorias públicas, como un activo que se pode trasladar desde a USC á mocidade implicada no proxecto ATLIC.

A relación de moitas das liñas e dos proxectos de I+D desenvolvidos ou nos que traballa a comunidade científica do Campus Terra xustifica a súa implicación no programa Atlantic Innoblue Communities, salienta López Mosquera, que citou neste senso o bo número de actuacións orientadas ao aproveitamento dos recursos mariños, así como proxectos enfocados ao control e eliminación de toxinas emerxentes, ademais doutros no plano da acuicultura, recuperación de especies en perigo de extinción, aproveitamento de augas rexeneradas, aproveitamento de algas e de descartes de peixe, iniciativas a prol da mitigación do cambio climático...