‘Mulleres bravas’ hondureñas presentan na EPS de Enxeñaría alternativas sustentables de produción
O proxecto o proxecto ‘Mulleres bravas de Honduras e Galicia. Tendendo pontes entre defensoras da vida’, impulsado por Amigas da Terra e Enxeñería Sen Fronteiras co apoio da Asociación Galega de Comunicación para o Cambio Social e o financiamento da Xunta de Galicia, permitiu a comunidade universitaria do Campus Terra da USC coñecer algunhas das iniciativas sustentables de produción e manexo da terra que se están a desenvolver no país centroamericano.
A labrega Verónica Rodríguez e a marisqueira Mariela Burgos deron conta na EPS de Enxeñaría de diferentes iniciativas que están a desenvolver en Honduras a prol da conservación da terra. Estas dúas mulleres hondureñas narraron as súas respectivas experiencias no marco dun coloquio aberto á comunidade universitaria.
O obxectivo deste proxecto é dar a coñecer e sensibilizar sobre impactos sobre as persoas e o medio ambiente dos proxectos industriais e extractivos tanto en Honduras como Galicia, ademais de presentar alternativas sustentables e, sobre todo, poñer o foco no labor das mulleres defensoras da terra e na necesidade de sumar forzas cara unha loita común fronte a macroproxectos empresariais que contaminan terras e augas, afectan aos ecosistemas e destrúen as comunidades ás que nin sequera se ten en conta á hora de tomar decisións.
Neste contexto, a labrega e lideresa comunitaria Verónica Rodríguez, que participa na construción de políticas para garantir a igualdade ao abeiro da Asociación de Desenvolvemento Pespirense (ADEPES) e preside a Reserva Estratéxica Comunitaria de Grans e Sementes Básicas, unha organización hondureña que traballa para asegurar a dispoñibilidade de alimentos básicos e a estabilidade de prezos nas comunidades durante períodos de escaseza e seca, deu conta á comunidade universitaria luguesa do traballo que está a desenvolver en Honduras.
Asemade, a marisqueira Mariela Burgos falou durante a súa intervención das distintas tarefas que realiza xunto con outros grupos de mulleres marisqueiras en aras a acadar outros ingresos. Burgos tamén aproveitou a súa presenza en Lugo para reivindicar a loita de distintos colectivos hondureños contra as empresas de cría industrial de lagostino que, segundo indicou, tratan de apoderarse dos espazos de recolección deste tipo de crustáceos.