Tres ex parlamentarios galegos conversan sobre democracia este venres con alumnado de Formación do Profesorado

A Facultade de Formación do Profesorado do campus de Lugo da USC acollerá este venres, a partir das 11.45 horas, na aula 29, unha das sesións programadas polo Parlamento de Galicia en colaboración coa Asociación de Ex Parlamentarios co obxectivo de espallar entre a xente moza os valores da democracia e tamén para favorecer o coñecemento do traballo que se desenvolve na institución representativa do Pobo Galego.

O coloquio programado no campus de Lugo ao abeiro desta iniciativa do Parlamento Galego contará coa participación de tres ex parlamentarios pola provincia de Lugo por tres formacións políticas diferentes, tal e como o son Manuela López Besteiro, Ismael Rego González e Alberte Xullo Rodríguez Feixóo.

O decano da Facultade de Formación do Profesorado, Francisco Rodríguez Lestegás, ser o encargado de abrir este foro, no que se agarda a participación de alumnado da materia de primeiro curso do Grao de Mestre en Educación Primaria Teoría e Historia da Educación Escolar, da que é responsable o profesor Francisco Xosé Candia.

A sesión, que comezará coa proxección dun documento audiovisual sobre o Parlamento de Galicia, rematará cunha quenda aberta de preguntas, durante o que o público asistente poderá interpelar a calquera dos tres relatores convidados.