As plantas medicinais no desenvolvemento sostible das Reservas da Biosfera de Lugo, a debate do 15 ao 18 de xullo no Ibader

‘ As plantas medicinais no desenvolvemento sostible das Reservas da Biosfera Terras do Miño e os Ancares lucenses e montes de Cervantes, Navia e Becerreá’ é o título do curso de verán da USC que se desenvolverá na sede do Instituto de Biodiversidade Agraria e Desenvolvemento Rural (Ibader) do 15 ao 18 de xullo. Este programa, dirixido por Antonio Rigueiro e Rosa Romero, está estruturado en 30 horas lectivas e ofrece un máximo de 50 prazas. A matrícula está aberta ata o 5 de xullo na web da USC.

Os obxectivos dos promotores deste curso de verán da USC pasan por ofrecer ao alumnado participante unha visión sobre as plantas e fungos medicinais desde diferentes puntos de vista, afondando nas especies que podemos atopar en Galicia e naqueles aspectos que fan posible que poidan ser contemplados como un recurso económico complementario no medio rural galego, e especialmente nos espazos protexidos, como as Reservas da Biosfera, contribuíndo así ao desenvolvemento rural nestas zonas.

O profesor da USC e director do Ibader, Pablo Ramil Rego, abrirá o 15 de xullo a quenda de intervencións cun achegamento á historia da utilización das plantas medicinais. Ademais de relatorios sobre cuestións ligadas aos principios activos de plantas medicinais, procesado industrial das mesmas e, entre outros temas, cultivo ecolóxico, o curso inclúe tamén obradoiros de cosmética natural, así como viaxes de prácticas á Serra do Courel e á Estación Científica do Courel, así como saídas de recoñecemento de plantas medicinais á Reserva da Biosfera Terras do Miño.