O profesor Walter Haug, premio Leibniz da República Federal de Alemaña, lega a súa biblioteca á USC

Preto de 8.000 volumes científicos sobre épica, novela, narrativa breve, mística e orientalismo pasarán a formar parte dos fondos da Universidade de Santiago grazas ao legado póstumo do profesor Walter Haug, catedrático de literatura alemá medieval da Universidade de Tübingen e premio Leibniz da República Federal de Alemaña.
O acto simbólico de recepción da biblioteca do profesor Walter Haug, ás 12:00 horas no Salón de Graos do Colexio de San Xerome, estará presidido polo vicerreitor de Relacións Institucionais, Lourenzo Fernández, e nel intervirán tamén o profesor Víctor Millet e o fillo do catedrático alemán, Andreas Haug.
Walter Haug mantivo especial relación coa USC a través do profesor Victor Millet, especialista en literatura medieval alemá e discípulo seu en Tübingen. Dende a chegada de Victor Millet á USC, Haug visitou a institución compostelá en tres ocasións, sempre para dar apoio ás iniciativas que avogaban por instaurar os estudos da literatura alemá premoderna como rama científica.