O reitor preside en Cáceres o Plenario da Comisión de Internacionalización e Cooperación das Universidades Españolas

O reitor Juan Casares asiste estes días na Universidade de Estremadura ao pleno da Comisión de Internacionalización e Cooperación das Universidades Españolas (CICUE) da que é presidente. A xuntanza comezou este xoves 21 cos debates de dous grupos de traballo dedicados á análise da situación actual da cooperación universitaria ao desenvolvemento e sobre mobilidade. No programa tamén se inclúe a intervención do profesor e experto do Consello de Cooperación, Carlos Mataix, coa conferencia ‘A cooperación ao desenvolvemento como oportunidade para a innovación e a internacionalización das universidades’. A xornada continúa pola tarde coa reanudación das xuntanzas do grupo de cooperación ao desenvolvemento e o inicio das relativas a internacionalización. O comisionado do Espazo Iberoamericano do Coñecemento (EIC), Félix García Lausín, dará conta deseguido das particularidades deste marco xeográfico. A xornada do venres 22 estará dedicada a un encontro con expertos de Bolonia e máis concretamente á internacionalización da educación superior, tema sobre o que se achegarán diferentes perspectivas que ilustren a experiencia europea e norteamericana. Por la tarde, revisarase a estratexia para a internacionalización das universidades de España e o proxecto de expertos de Bolonia de España. Estes dous días de xuntanza en Cáceres rematarán co pleno desta Comisión da Conferencia de Reitores de Universidades Españolas (CRUE).