As segundas Leccións Xacobeas exporán na USC as últimas achegas científicas ao redor do Camiño de Santiago
Un total de quince conferencias impartidas por investigadores de universidades, centros e institutos de investigación nacionais e internacionais exporán as últimas achegas científicas existentes ao redor do Camiño de Santiago. Será no transcurso das segundas ‘Leccións Xacobeas: Tras o legado do Apóstolo Santiago’, coas que se pretende promocionar a investigación e o coñecemento da peregrinación a Santiago entre o alumnado da USC e os cidadáns composteláns.
Estas Leccións, promovidas pola USC, o Xacobeo, a Dirección Xeral de Turismo e o Cabildo da Catedral de Santiago, celebraranse do 15 ao 18 de outubro no Paraninfo da Universidade (Facultade de Xeografía e Historia) e contan co recoñecemento dun crédito de libre configuración para todas as titulacións da USC.
A primeira xornada, o día 15 de outubro, estará dedicada ao Camiño, a liturxia e á historia da peregrinación, coas intervencións de José María Díaz, deán da Catedral de Santiago e dos catedráticos da USC Ofelia Rey Castelao e Ramón Villares Paz. Ao día seguinte abordaranse as novas liñas de investigación sobre a temática xacobea, como as peregrinacións na Idade Moderna, a publicidade sobre o Camiño de Santiago, a invención da arquitectura xacobea e a presenza de Santiago na cidade de Roma, a cargo dos profesores Domingo González Lopo, Federico López Silvestre, Alfredo Vigo Trasancos e Rosa Vázquez Santos.
As leccións do 17 correrán a cargo de destacados investigadores e expertos estranxeiros. Concretamente o historiador Klaus Herbers tratará sobre relatos escritos por camiñantes e os arquitectos Bern Nicolai e Klaus Rheidt analizarán o Pórtico da Gloria e a portada occidental da Catedral de Santiago. O profesor italiano Benedetto Vetere, catedrático de Historia Medieval da Universidade de Lecce, disertará sobre a peregrinación en Europa e o Mediterráneo e Vincenzo Pacelli, catedrático de Historia da Arte da Universidade Federico II de Nápoles explicará La iglesia de San Giacomo degli Spagnoli en Nápoles.A xornada final dedicarase á actualidade do Camiño, protección, asociacionismo e novos proxectos coa participación de Antonio Roma Valdés, fiscal especialista en Patrimonio Histórico; Felipe Arias Vilas, director xeral de Patrimonio Cultural da Xunta de Galicia; José Antonio de la Riera, presidente da Asociación de Amigos do Camiño de Santiago; e Ignacio Rodríguez Eguíbar, director xerente da Sociedade Anónima de Xestión do Plan Xacobeo. Alternando coas conferencias, están previstas visitas guiadas ao Museo, Arquivo e cubertas da Catedral.