Terceira NerdNite este martes na Nave de Vidán

A Nave de Vidán (Avenida Mestra Míguez, 44) converterase este martes 27 na sede da terceira sesión das Nerd Nites Compostela, que están acadando grande éxito e interese entre a cidadanía. Nesta ocasión, ás 22.00 horas intervirán Cassarina Verret coa charla ‘Se poden, por que non o fan? O trastorno por déficit de atención sen ou con hiperactividade (TAD-H)’; Manuel Collado con ‘ En busca da fonte da eterna xuventude’; e Javier Mas con ‘Perdidos no espazo-tempo’. Os tres falarán durante menos de unha hora para logo iniciar un coloquio informal entre todas as persoas asistentes. Preparando o segundo trimestre Péchase así o programa do primeiro trimestre das NerdNites, unha orixinal proposta nacida hai anos en Estados Unidos á que se sumou este curso Compostela, por primeira vez en España. A primeira sesión tivo lugar en setembro no Kunsthalle, coa participación de Miguel López coa charla ‘Comer e “ gastar” todo é empezar: o problema da obesidade’, David Barro con ‘Por que a pintura xa non é pintura?’ e Francisco Martínez con ‘Spiderman e as redes de poder’. O Café Casino foi o lugar elixido en outubro para a segunda sesión, na que interviñeron Carmen Pomar coa charla ‘O cociñeiro, o biscoito e o paraugas: da intelixencia intelixente’, Carlos Díaz con ‘¿Quen é o mellor?’, e Chus Agra, Carmen Franco e Cristina Trigo con ‘Agora máis que nunca: construír utopías na educación artística’. Persoa de pouca resposta emocional

Nerd é o acrónimo en inglés de Non-Emotionally-Responding Dude (persoa de pouca resposta emocional), individuos que fusionan as súas paixóns coa súa vida dando lugar a unhas personalidades peculiares. Nas Nerd Nites charlan co público das disciplinas que lles apaixonan nun ton distendido e fóra do ámbito académico.