A USC suma o seu catálogo dixital á plataforma editorial galega MeuBook
O catálogo de e-books da USC xa está dispoñible na plataforma de distribución dixital galega MeuBook, na que conflúen diferentes aspectos das redes sociais e do almacenamento bibliográfico para afrontar e coordinar a demanda editorial nun proceso de produción racional e dirixido aos lectores. O Servizo de Publicacións da USC integrouse en MeuBook en 2010 coa sinatura dun contrato de distribución comercial de e-books baixo demanda. A plataforma integra todo o circuíto editorial, dende os escritores, editores ou distribuidores ata os lectores, cun servizo especial para cada un deles. Ademais, unha das particularidades de MeuBook é a utilización das redes sociais para poñer en contacto a todos os elos que compoñen a cadea de valor do proceso editorial. Ao ritmo do dixital Nos últimos anos, a USC ten demostrado unha especial sensibilidade coa vertente dixital da produción editorial. De feito, a exploración das distintas posibilidades que ofrece a edición no contorno dixital supón un fito para a USC xa que son moi contadas en España as institucións educativas que están a aproveitar o potencial das novas tecnoloxías neste sector. Unha das máis recentes alternativas nesta liña de traballo foi a inauguración no mes de abril do propio espazo e-book da USC, a libraría dixital da institución académica compostelá. Trátase dunha parte fundamental do proxecto dixital do Servizo de Publicacións universitario que arrancou en 2008 coa incorporación de boa parte do seu fondo a Google Book Research. Este espazo inaugurouse con medio centenar de novidades dos anos 2009, 2010 e 2011 en formatos pdf e epub, descargables para monitores, e-readers e móbiles e co denominado DRM Social. A incorporación a MeuBook, é un banzo máis neste proceso de desenvolvemento dixital que a institución está a acometer nos últimos tempos. De feito, a finais de ano o Servizo de Publicacións tamén colocou o seu catálogo na plataforma Todoebook.com, xestionada pola empresa líder no mercado editorial dixital Publidisa. Ademais, a USC tamén está presente na plataforma conxunta para a venda de e-books das universidades, auspiciada pola Unión de Editoriales Universitarias españolas, ou colabora con Googlebooks.
En conxunto, a Universidade de Santiago mantén na actualidade posicións de vangarda no terreo da edición dixital coa incorporación das novas potencialidades tecnolóxicas ao seu servizo editorial.