Veterinaria celebra este sábado o acto de graduación de preto de 80 novos titulados da promoción 2011-2016

A Facultade de Veterinaria do Campus Terra da USC celebrará este sábado 18 de xuño, a partir das 11.00 horas, no auditorio do centro, o acto de graduación da promoción 2011-2016. O vicerreitor de Organización Académica e Persoal Docente e Investigador da USC, Luís Lima, será o encargado de presidir esta cerimonia académica, na que están inscritos preto de 80 alumnos e alumnas que completaron o grao en Veterinaria no último lustro.

O decano da Facultade de Veterinaria da USC, Germán Santamarina Pernas; a vicedecana de Organización Académica e Estudantes, Izaskun Ibarguren; a alcaldesa de Lugo, Lara Méndez; a decana do Colexio Oficial de Veterinarios de Lugo, Ana López Pombo; o deputado provincial Álvaro Santos, e a profesora da Facultade de Veterinaria da USC e madriña da segunda promoción de grao, María Luisa Suárez Rey, tamén intervirán como relatores no marco desta cerimonia académica. A madriña da promoción do grao de Veterinaria 2011-2016 abrirá a quenda de intervencións da sesión cunhas verbas dirixidas aos futuros veterinarios e veterinarias, que, de seguido, recibirán a beca de graduación xunto co Xuramento do Médico Veterinario e, por agasallo do Colexio Oficial de Veterinarios da Coruña, a insignia da profesión. Os novos graduados e graduadas tamén serán obsequiados, por xentileza de Royal Canin, co libro ‘Enciclopedia da nutrición clínica felina’ . A intervención dos estudantes, que farán unha semblanza desta nova promoción de veterinarios graduados, e dos membros da mesa, servirá de colofón ao acto, tralo que todos os asistentes compartirán un ágape na entrada do auditorio da Facultade de Veterinaria.