Xente nova para o campus de Lugo
Máis de 400 estudantes de ensino medio procedentes de sete centros educativos da provincia de Lugo (CPR Divina Pastora-Salesianos, de Lugo; IES Enrique Murais, de A Pontenova; IES Poeta Díaz Castro, de Guitiriz; IES Gregorio Fernández, de Sarria; IES Ánxel Fole, de Lugo; IES Leiras Pulpeiro, de Lugo, e CPR San José) visitaron este venres os distintos centros da sede universitaria luguesa, a través do programa Encontros no Campus Terra de Lugo, unha xornada orientada a dar a coñecer a oferta de estudos e servizos deste campus da USC a estudantes preuniversitarios, organizada ao abeiro do programa ‘A Ponte entre o Ensino Medio e a USC’.
A vicerreitora de Coordinación do campus de Lugo, Montserrat Valcárcel Armesto, e o coordinador do programa ‘A Ponte’ nesta sede universitaria, Francisco Javier López, foron os encargados de dar a benvida ao estudantado preuniversitario nun acto desenvolvido no auditorio da Facultade de Veterinaria, onde Valcárcel salientou o “alto grao de satisfacción amosado por todos aqueles mozos e mozas que optan por vivir a súa experiencia universitaria no campus de Lugo”. “O máis difícil é a primeira decisión de escoller Lugo como destino universitario, pero merece a pena”, sentenciou Valcárcel na recepción inicial ao estudantado preuniversitario, que logo asistiu a unha presentación xenérica do campus lugués, así como da programación académica dispoñible e da oferta de servizos accesible para todos os membros da comunidade universitaria.
Unha vez rematada esta sesión, os estudantes, distribuídos en grupos en función das súas preferencias formativas e acompañados de estudantes e profesores universitarios, completaron itinerarios de visitas ás distintas facultades e escolas do campus de Lugo, ademais de facer un percorrido polas instalacións da Biblioteca Intercentros.
Participantes na última quenda de visitas dos Encontros no campus de Lugo
