Indonesia procura no Campus Terra da USC saídas para mellorar a sustentabilidade das súas plantacións de arroz

A decana da Facultade de Agricultura da universidade Mohamadiya de Yogyakarta, Indira Prabasari, mantivo este luns un encontro coa vicerreitora de Coordinación do campus de Lugo, Montserrat Valcárcel Armesto, no edificio de Vicerreitorías da USC no Campus Terra de Lugo, no marco dun acto no que tamén participou Jesús Varela Zapata, adxunto á Vicerreitoría para Estudantes, Internacionalización, Cultura e Servizos, e o xestor de Internacionalización do Campus Terra da USC, Pedro Fiz Rocha Correa.

A visita de Prabasari á sede universitaria luguesa responde á procura de colaboración en materia de investigación agroecolóxica no marco do proxecto de I+D titulado ‘Indicadores de biodiversidade para mellorar a sustentabilidade dos campos de arroz para previr crises alimentarias’, orientado a mellorar a seguridade alimentaria e a sustentabilidade das plantacións de arroz.

A doutora Prabasari pretende aproveitar a súa breve estadía en Lugo para manter unha reunión de traballo con Rosa Mosquera, catedrática do Departamento de Produción Vexetal e Proxectos de Enxeñaría e profesora na Escola Politécnica Superior de Enxeñaría do Campus Terra da USC, a fin de establecer sinerxías para avanzar sobre esta liña de traballo e estudo.

Os resultados deste proxecto de I+D poderían servir de axuda ao labrador indonesio para entender a importancia da conservación de biodiversidade na agricultura, unha biodiversidade ameazada polo emprego de substancias como pesticidas, fertilizantes ou herbicidas.