A USC está comprometida institucionalmente coa consecución dos Obxectivos de Desenvolvemento Sostible (ODS) da Axenda 2030 aprobada polas Nacións Unidas e está a elaborar un novo PDS en converxencia con eses obxectivos ambientais e sociais aliñados cos chamados 5 P (Persoas, Planeta, Prosperidade, Paz e Partenariado –alianzas–), que contemplará accións específicas do ámbito da xestión e a gobernanza, da formación e a docencia, da investigación e o compromiso social.
O novo PDS articularase ao redor de tres eixos:
-
Xeración de coñecemento e educación ambiental.
-
Planificación, xestión e avaliación ambiental.
-
Sensibilización ambiental e participación.
No marco da Programación Plurianual (2019-2022), a USC impulsa as seguintes accións:
-
USClima. Elaboración dun plan de acción polo clima que contempla accións para o rexistro e o control da pegada ecolóxica e para a súa redución, absorción e compensación, xunto a iniciativas de sensibilización e apoio á Declaración de Emerxencia Climática e contidos específicos para o Programa de Formación e Innovación Docente e o Plan de Formación do PAS, ademais da elaboración de proxectos para a adaptación e a mitigación do cambio climático a presentar nas convocatorias dos programas Life e Interreg da Unión Europea.
-
Política de Plásticos 0, para atinxir a curto e medio prazo unha redución efectiva da cantidade de plástico empregado. Para isto asinaranse acordos con cafetarías, comedores e concesionarios de máquinas expendedoras.
-
Política integrada do ciclo de vida na xestión dos residuos (singularmente de aparellos eléctricos e electrónicos), coa elaboración dunha guía de xestión da USC, a inclusión de cláusulas específicas en pregos e contratos e o desenvolvemento de campañas de sensibilización.
-
Campus Sustentables. Intervencións orientadas a promover cambios de hábitos para reducir o consumo de enerxía, combustibles e auga, dotar os centros de novos equipamentos, infraestruturas e programas que favorezan novos tipos de mobilidade e crear espazos abertos de traballo.
-
USC saudable e xusta, co obxectivo de facer dos comedores e cafetarías universitarias un referente da alimentación sustentable, coa extensión da dieta atlántica e a compra de proximidade e en entidades de comercio xusto dos produtos.