A inauguración do curso académico 2025-2026 do Sistema Universitario de Galicia terá lugar este 4 de setembro na Universidade de Santiago nun acto co reitor compostelán, Antonio López, o presidente da Xunta de Galicia, Alfonso Rueda, e os reitores das Universidades de Vigo e A Coruña así como numerosas autoridades académicas e civís.
A cerimonia, que se poderá seguir en directo na Canle Youtube da USC, comezará ás 11.55 coa saída da comitiva académica dende a Reitoría ata o Salón Nobre do Colexio de Fonseca, onde ás 12.00 horas comezará o acto solemne coa lección maxistral a cargo do profesor de Historia Contemporánea Xosé Ramón Veiga Alonso titulada 'Muller e esfera pública no século XIX. Historia dunha conquista inacabada'. Deseguido intervirá o presidente do Consello do Estudantado da US, Andrés Couso Viana.
O acto rematará cos discursos do reitor Antonio López e do presidente Alfonso Rueda, quen dará por inaugurado o curso académico.