Os horarios extraordinarios das bibliotecas da USC estenderanse do 21 de abril ao 30 de xuño
O período de apertura extraordinario das bibliotecas da USC por mor dos exames do segundo semestre comeza o 21 de abril e estenderase ata o vindeiro 30 de xuño. En total, a USC oferta máis de 3.400 prazas divididas en distintos puntos de servizo nos campus de Santiago e Lugo. Tanto a Biblioteca Intercentros do campus lucense, como a Biblioteca Concepción Arenal en Compostela, abrirán do 21 de abril ao 5 de xuño, entre as 8.30 e as 0.00 horas; mentres que do 6 ao 30 de xuño, o horario estenderase entre as 9.00 e as 22.00 horas.
A Sala de Lectura de Dereito súmase tamén a esta apertura extraordinaria do 28 de abril ao 11 de maio, en horario de 8.30 a 3.00 horas; do 12 de maio ao 1 de xuño, durante as 24 horas; e do 2 ao 8 de xuño, entre as 8.30 e as 3.00 horas. A Facultade de Ciencias Económicas e Empresariais, pola súa parte, abrirá as portas da súa biblioteca, do 28 de abril ao 1 de xuño, entre as 8.30 e as 22.00 horas; mentres que a de Bioloxía estenderá a súa apertura de luns a venres, entre o 1 de maio e o 1 de xuño, de 8.30 a 22.00 horas; mentres que a apertura en fin de semana e festivos do 17 de maio ao 1 de xuño, estenderá o seu horario entre as 8.30 e as 22.00 horas. Finalmente, a biblioteca da Escola técnica Superior de Enxeñería, de luns a venres, entre o 12 de maio e o 1 de xuño, abrirá entre as 8.30 e as 22.00 horas.
Postos de lectura
A BUSC acaba de incluír dentro dos servizos que oferta a través da súa páxina web, a consulta da porcentaxe de ocupación dos distintos puntos de servizo, así como o número de postos libres dispoñibles periodicamente. Para acceder a esta información, é necesario entrar no web da biblioteca universitaria e picar no recadro Postos de lectura. A información actualízase aproximadamente cada dúas horas, prazo que pode reducirse nas horas de máxima ocupación.
O horario de cobertura vai de luns a venres, entre as 9.00 e as 21.00 horas, e as fins de semana e festivos de 9.00 a 19.00 horas, nas bibliotecas que abren nesta quenda. Así, este servizo amplía o xa existente en período de horarios extraordinarios, permitindo que a consulta poida realizarse en calquera época do ano.
Ademais, a páxina web da BUSC cambiou a súa interface coa incorporación dun acceso directo ás Coleccións e outro á Oferta de cursos que este servizo universitario organiza ao longo do ano académico.
